Saturday, April 3, 2010

လက်သည်းချွန်ကြားက “ည”

အဲဒီဆေးမဆိုးထားတဲ့ လက်သည်းချွန်ချွန်လေးတွေပေါ့
ငါ့အတွေးတွေထဲအထိ
ဝင်ရောက် ကုတ်ခြစ်ပစ်နိုင်စွမ်းရှိတယ်…

ဟိုဘုရင်က လက်နဲ့ထိရင်ရွှေဖြစ်သတဲ့
အဲဒီလက်သည်းချွန်ချွန်လေးတွေနဲ့ ထိရင်
အကြင်နာအတိ…ငါ့ရင်မီးတွေ
တဟုန်းဟုန်းငြိမ်းခဲ့ရပေါ့….

နောက်ပြီး အဲဒီ လက်သည်းချွန်ချွန်တွေရဲ့
ဆွဲငင်မှုမှာ
နေဝင်မီးငြိမ်း
တိမ်တွေတဖျပ်ဖျပ်ခတ် ခဲ့ရပေါ့

အဲဒီ လက်သည်းချွန်ချွန်တွေပိုင်ရှင်က
ကြယ်တွေကို ဇယ်တောက်ရင်း
လမင်းကို ပွတ်သပ်ကြည့်ချင်သေးသတဲ့လေ

ကလီယိုပက်ထရာရဲ့လက်တွင်း
ရောမအင်ပါယာအရှင်
ဆီဇာဘုရင် သက်ဆင်းရသလိုမျိုး
ဧကရီဘုရင်မရဲ့ လက်သည်းချွန်ချွန်တွေပေါ်မှာ
ငါ့နေမဝင်အင်ပါယာတစ်ခုလုံး
မျက်စိတစ်မှိတ်အတွင်း
အတုံးအရုံးကျဆုံးလို့ပေါ့
ရုန်းထွက်ခွင့်တောင် မရလိုက်မိဘူး…

Thursday, April 1, 2010

ဧပြီအရူး

နွေတန်ခူးမို့
လေရူးတို့
သွေစို့ပြန်သနော်

ဖြေလျှော့ကာပူ
နေတော့မူ
ကြံယူသော်လည်း

ခါသင်္ကြန်မာန်
လာပြန်ဟန်
တစ်ဖန်နွှဲရပါ့

မြေသင်းနံ့တေး
ပိတောက်မွှေး
ခိုင်လေးညှာတံငယ်ကို

မလေးကေသာ
ပိတုန်းဖြာ
ဆံဗျာစမှာပ
ပန်လိုက်ကဲ့လေး…

(မြန်မာသံပေါက်ကဗျာပါ...ကာရန်ကဗျာ စပ်ရတာပျော်ဖို့ကောင်းတယ်)

Monday, March 29, 2010

ကစဥ့်ကလျား ဝိဥာဉ်

နေ့နဲ့ညတွေ က စဥ့် က လျား

အိပ်မက်တွေ က စဥ့် က လျား

သင်္ကေတတွေ က စဥ့် က လျား

တွေးခေါ်၊ချောင်းဆိုး၊ သလိပ်ခတ်သံ က စဥ့် က လျား

ဆေးလိပ်ပြာတွေ က စဥ့် က လျား

အချစ်၊ အမုန်းတွေ က စဥ့် က လျား

နာရီ၊ရာသီဥတု၊ အဟာရ က စဥ့် က လျား

ဆံပင်တွေ က စဥ့် က လျား

ရေသံ မီးသံ တွန်သံ က စဥ့် က လျား

ရစ်သမ်မမှန်သော ဂီတသံ က စဥ့် က လျား

မိုးဦးလေသံ၊ မြေသင်းနံ့ က စဥ့် က လျား

ခပ်ကြမ်းကြမ်းစုတ်ချက်တစ်ချို့ က စဥ့် က လျား

နူးညံ့သိမ်မွေ့သော အထိအတွေ့ က စဥ့် က လျား

ပါးပြင်ပေါ်ပြုတ်ကျကျန်ခဲ့သော အနမ်းတပွင့် က စဥ့် က လျား

စကားလုံးတွေ က စဥ့် က လျား

ဒီကဗျာလည်း က စဥ့် က လျား….

Sunday, March 7, 2010

ပြိုင်ပွဲ

ကောင်းကင်တွင် တိမ်သားမည်းမည်းများက တရိပ်ရိပ် တက်လာသောအခါ လေကတဖြည်းဖြည်းထန်လာသည်။ ရွက်ထဲသို့ လေအပြည့်တိုးဝင်လာသောကြောင့် သူ့လှေကလည်း အရှိန်တဖြည်းဖြည်းမြင့်တက်လာသည်။ သူ့အာရုံတွင် လက်ထဲက တက်ကို မြဲမြံစွာကိုင်၍ လှေကို လေအားနှင့်အတူ ပန်းတိုင်သို့ မြန်သထက်မြန်အောင် ရောက်ရန်သာ အရေးကြီးနေသည်။ ပြိုင်ပွဲတွင် ဗိုလ်စွဲအနိုင်ရရန် အရေးကြီးသည် မဟုတ်ပါလော။ သူ့ကဲ့သို့ ပင် တစ်ခြားနိုင်ငံမှ ပြိုင်ဘက်များကလည်း သူ့အား ကျော်တက်နိုင်စေရန်အတွက် အနောက်မှ တဝေါဝေါဖြင့် ကပ်လိုက်လျှက်ရှိသည်။ ဒီနိုင်ငံကာပြိုင်ပွဲတွင် အနိုင်ရ ဗိုလ်စွဲမှ သူမျှော်လင့်ထားသော ဆုဖလားကို ရယူသိမ်းပိုက်နိုင်သလို တိုင်းပြည်အတွက်လည်း တာဝန်တစ်ခုကျေပွန်အောင် ဆောင်ရွက်နိုင်လိမ့်မည်ဟု သူဆုံးဖြတ်ထားပြီးဖြစ်သည်။ သူ့ခန္ဓာကိုယ်တွင် ရှိသမျှ ကြွက်သားများကို ဖျစ်ညှစ်၍ လှေမတိမ်းစောင်းစေရန် အရှိန်အကောင်ဆုံးရစေရန် ကြိုးစားလျှက်ရှိသည်။

သူနောက်ထပ် ဘွိုင်(buoy) တစ်ခုကို ပတ်ပြီးလျှင် ပန်းဝင်ရန်သာရှိတော့သည်။ လေကလည်း ပြင်းသထက်ပြင်းလာကာ လှေတစ်ချို့မထိန်းနိုင်သဖြင့် မှောက်ကုန်လေတော့သည်။ သူကတော့ သဘာဝကို အန်တုကာ ပန်းတိုင်သို့သာ အစောဆုံးဝင်ရန် အားခဲလျှက်။ ထိုအခိုက်တွင် မမျှော်လင့်ထားသော အရာတစ်ခု ရုတ်တရက်ဖြစ်ပေါ်လာသည်။ သူတို့ နိုင်ငံမှ ကောင်မလေးတစ်ယောက် သူပတ်ခဲ့သော ဘွိုင်သို့မရောက်ခင် လေပြင်းလွန်း၍ လှေမှောက်နေသည်။ သူ့လှေက ထိုကောင်မလေးလှေအနားမှအဖြတ်တွင် လှိုင်းကြီး လေကြီးလွန်းသဖြင့် သူမဘာသာ လှေပြန်မထောင်နိင်။ မှောက်နေသော လှေကို ကိုင်ကာ အားကိုးရာမဲ့ အော်ငိုနေသည်။ နောက်ပြီး သူမ အသက် က အခု မှ ၁၀ နှစ်ပင်မရှိသေး။ ပြိုင်ပွဲအတွက် တာဝန်ယူထားသော အသက်ကယ်အဖွဲ့မှာလည်း မှောက်သော လှေများများလွန်းသည့်အတွက် သူမဆီသို့ရောက်မလာနိုင်။ ရေကလည်း ရေခဲမှတ်နားကပ်နေသည့် အခြေအနေ အေးစက်လွန်းနေသည်။ သူ့ Wetsuit (အအေးဒဏ်ကို ကာကွယ်ရန်ဝတ်သော လည်ပင်းမှ ခြေထောက်အထိလုံခြုံစေသာ အင်္ကျီ) အတွင်းမှပင် သူအအေးဓာတ်ကို ခံစားသိရှိနေရသည်။ ရေခဲတမျှအေးသော ရေထဲတွင် အားကိုးရာမဲ့ အော်ငိုနေသော မျက်နှာ။ အရေးကြီးသော နောက်ဆုံးပြိုင်ပွဲ။ ရုတ်တရက် သူ့ခေါင်းထဲသို့ လျှပ်စီးမိုးကြိုးလက်သလို အတွေးတစ်ခု ဝင်ရောက်လာသည်။

စက္ကန့်ပိုင်းအတွင်းမှာပင် သူ့လှေမှကြိုးကို ခြေထောက်တွင်ချည်၍ ရေထဲသို့ ဒိုင်ဗင်ထိုးချလိုက်သည်။ ထို့နောက် ထိုကောင်မလေးရှိရာသို့ ကူးခတ်သွား၍ လှေကို ကျွမ်းကျင်စွာပြန်ထောင်မတ်ပေးလိုက်သည်။ ထို့နောက် သူက ရေထဲမှာနေ၍ သူမကို လှေပေါ်သို့ပြန်တွန်းတင်ပေးလိုက်ကာ လှေထဲတွင်ရှိသောရေများကို တတ်နိုင်သလောက်ခပ်ထုတ်ပေးလိုက်သည်။ ထိုအချိန်တွင် အသက်ကယ်လှေအဖွဲ့ ရောက်လာကာ သူမကို ကမ်းစပ်သို့ ပြန်လည်ခေါ်ဆောင်သွားတော့သည်။ သူမကတော့ ငိုနေတုန်းပင်။

ထို့နောက် သူ့လှေပေါ်သို့ ပြန်တက်လိုက်ကာ ပြိုင်ပွဲကို ဆက်ပြိုင်လေသည်။ ခရာ မှုတ်သံနှင့်အတူ ပန်းဝင်လေပြီ။ သို့သော် သူအလိုချင်ဆုံးသော ပထမနေရာတော့ မဟုတ်တော့။ ဆုပေးပွဲတွင်လည်း သူအလိုချင်ဆုံးသော ဆုဖလားကို တစ်ခြားနိုင်ငံသားတစ်ယောက် ရယူသွားသောအခါတွင်လည်း သူအားရပါးရပြုံးလိုက်မိတော့သည်။ သူ့ရင်ထဲတွင်ဖြစ်ပေါ်မိသော ပီတိမှာကား ထိုပွဲတွင် အနိုင်ရဗိုလ်စွဲရခြင်းထက် အဆပေါင်းများစွာသာလွန်ကြောင်း သူ့ကိုယ်တိုယ်သိရှိနေသောကြောင့်ဖြစ်သည်။

Wednesday, February 17, 2010

ဟေမာနေဝင်း သီချင်းကဗျာ (ဇော်ဇော်အောင်၊ သဘင် ၊ ၁၉၈၆ သြဂုတ်)

မွှေးပျံ့သော ပန်းခင်းမှ ပန်းခြင်းတစ်ခုစာ အပြာရောင်ပန်းများ ခူးယူခဲ့ပြီးနောက် ဘယ်သူ့ထံမှောက် အရောက်ခစား၍ ပန်းများကို ပေးအပ်ရပါမည်နည်း။ ဆောင်းဦးပေါက် တစ်နေ့တာအတွက် ကဗျာများ ဖူလုံစွာ စပ်ပြီးပြီလား။

မနေ့က ကဗျာများသည် သည်ကနေ့ ကဗျာများကို ဖျော့တော့စွာ ငြင်းဆိုနေကြကြောင်း ကြားသိလိုက်ရသောကြောင့် စိတ်မသက်သာ။ ကဗျာက ငြင်းသည်လား၊ လူကငြင်းသည်လား။ ရောင်ဝါမထွန်းချမ်းရှာလွန်း၍၊ တည့်မွန်းချိန်နေ၊ ရောက်လွယ်စေဟု…။နေက ချမ်းသည်လား၊ လူကချမ်းသည်လား။

မြို့မငြိမ်း၏ ရေချိုးဆိပ်အနားက သစ်ဖောင်ပေါ်မှာ ကြောင်တစ်ကောင်ရှိ၏ ထိုကြောင်ကို ဘယ်သူပင်ပန်းကြီးစွာ ရေချိုးပေးနေသည်လဲ။

ပန်းတွေဝေနေအောင် ပွင့်နေသည်။ ပန်းတွေနှင့်ဝေ၊ ပန်းကလေးတွေနှင့်ဝေ၊ တွေနှင့်ဝေ။ ဒေါ်စိန်ငုံ သီချင်းဆိုနေသည်။ မောင်ဝဏ္ဏ ရုပ်ရှင်ရိုက်နေသည်။ ပန်းကလေးတွေနှင့်ဝေ၊ ပန်းတွေနှင့်ဝေ၊ ကတ္တီပါပန်းခင်းထဲမှာ ကျက်သရေ ကင်းမဲ့စွာ ရာဘာဖိနပ် သဲကြိုးပြတ်တစ်ဖက်။ ကျေးဇူးပြု၍ မနေတတ်သူများ ထိုဖိနပ်ကို ကာသိကရာဇ်တိုင်း ဖြစ် ပိုးသားစစ်စစ် ပုဆိုးတစ်ထည်ဖြင့် ထုပ်၍ စကြဝဠာ အပြင်ဘက်သို့ သွားရောက်ပစ်ချခဲ့ပါ။

ရွာထဲသို့ အရူးဝင်သောအခါ ကလေးတွေဆူ၏။ အကြီးအကျယ်ဆုံး ဟာသ တစ်ပုဒ်ကို ရေခဲတုံးဖြင့် ပန်းပုရုပ် ထုလုပ်နေကြသည်လား။

နေရောင်ချည် ဖြန့်ကျက်သော နံနက်ခင်း၏ နှင်းမြူဇာမှာ ရွှေရောင် ငွေရောင် အကွက်ဆင်များ သံစဉ်ညှိ၍ ဖူးပွင့်လာပါစေ။ ‘ထိုအခါ နေခြည်နှင်းမြူဇာကို ထက်အောက်ဆင်တူ ဝတ်စုံချုပ်၍ ကောလိပ်ဂျင်နေဝင်း၏ သမီးကလေးကို မွေးနေ့လက်ဆောင်ပေးလိုက်ကြပါ။ သူသီချင်းဆိုနေပါစေ’။ သီချင်းသံပဲ ကြားပါရစေ။ အေးအေးဆေးဆေး နားထောင်စမ်းပါရစေ။ သူတို့မရှိဘဲ သူတို့မပါဘဲ ဘဝသည် အလိုလိုမောနေ၏။ မျောနေ၏။ မွန်းနေ၏။ အမောသမား၊ အမျောသမား၊ အမွန်းသမားများ သံသရာရေးပြင်မှာ ရေနစ်၍ မသေ၊ အခုတလော နားကြောပြတ်၍ သေကြရလျှင် တစ်စုံတစ်ယောက်တော့ ဝမ်းသာပေလိမ့်မည်။

မိုက်မလင်းနိုင်ဘု၊ မြိုက်ခင်းညာဆီမျာ ခါတော်မီ သီမဝေ့နိုင်ဘု၊ သည်ကွေ့မှာ၊ ခါတော်မီ သီသီလေးတောင် မဝေ့နိုင်ဘု၊ မိုက်မလင်းနိုင်ဘု၊ သည်ကွေ့မှာ၊ နေကုန်မျောရှာကြ၊ ခါတော်မီ၊ ခါတော်မီ၊ သည်ကွေ့မှာ၊ တစ်နေကုန်အောင်မျော၍၊ ခါတော်မီ၍ သည်ကွေ့မှာ… ဟေမာနေဝင်း သီချင်းတစ်ပုဒ်လောက် ထပ်ဆိုပါ။ ‘မင်းအဖေကို တို့ သတိရသည်’။ ပါးစပ်အလှဆုံး၊ သွားအလှဆုံး၊ မေးရိုးအလှဆုံး သမီးလေးကို မွေးမှမွေးတတ်ပလေ။

အရူးတွေမလာနှင့်။ မိမဆုံးမ ဖမဆုံးမ ကလေးတွေ၊ မလာနှင့် ပန်းခင်းထဲမှာ ပန်းတွေ ညှိုးလျော်နေသည်လော။ ရေလောင်းပါ၊ ပေါင်းသင်ပါ။ မြေကို ဆွပါ။ နှင်းမိုးများ ရွာသွန်းဖြိုးအောင် သိပ္ပံပညာကို အကူအညီတောင်းပါ။

အဝါရောင်တိမ်တိုက်များ၏ ဖွားရာဇာတိသည် ပိတောက်ပန်းဖြစ်၏ မအူမလည် နိုင်ငံရေး စကားလုံးများ၏ ဖွားရာဇာတိသည် ညစ်ထေးသော သမိုင်းသဲမြေပွပေါ်မှ ခြောက်သွေ့နေသော တံတွေးကွက်များဖြစ်၏။ အကောင်းဆုံးကတော့ မသိဘဲနှင့် ဝင်ဝင်မပြောနှင့်။ ဟိုမှာ သီချင်းသံများ ဝဲပျံလာနေသည်။ မြက်ခင်းပေါ်က သစ်ရွက်ခြောက်ကို ကောက်၍ပစ်။ ကော်ဇောအသစ်ကို ဖုန်ကောင်းစွာ ခါ၊ ထိုနေရာမှာ ဖြန့်ခင်း၊ သီချင်းသံကို နေရာပေးပါ။

ရင်ထဲမှာ မီးပုံ။ အဂ္ဂဘုံမှာ ကဗျာဆရာများ နေ၏။ သူ၏မှတ်ပုံတင် ကတ်ပြားနှင့် အိမ်ထောင်စုစာရင်းသည် သူ့ကဗျာများဖြစ်၏။ သူသည် ထမင်းကို စားသူမဟုတ်၊ ကဗျာကို စားသူဖြစ်၏။ ကဗျာနှင့် နေသည်။ ကဗျာကို နေသည်။ ကဗျာတွင် နေသည်။ ကဗျာအား နေသည်။ ကဗျာကြောင့် နေသည်။ ကဗျာက နေသည်။ ကဗျာမှ နေသည်။ ကျောက်စီခြယ် ရွှေကလာပ်မှာ လိမ်းကပ်သည့် မြူမှုန်ဖယ်၍ ကဗျာကိုထားပါ။ ကဗျာကို ဆရာလိုထားပါ။ ကမ္ဘာပေါ်မှာ အကြီးမြတ်ဆုံးဟု ကမ္ဗည်းထိုးပါ။ ဆော့ခရိတ္တိခေတ်မှာ လူသွား၍ ဖြစ်သူကို စောင်အဖြူတစ်ထည် ကိုယ်မှာပတ်၍ ကျောင်းသားလှေကားထစ်များပေါ်မှာ မတ်တတ်ရပ်စေ၍ မိန့်ခွန်းခြွေခိုင်းပါ။ ခေါမခေတ်၊ ရောမခေတ်၊ ဘောမခေတ်၊ သောမခေတ်တွေ၏ ရှေ့အဝေးကြီးမှာ ကဗျာရောက်နေပြီဖြစ်ကြောင်းကိုတော့ သူကောင်းစွာ သိဖို့လိုမည် မထင်ပါ။ ကဗျာဆရာသည် စပါးစိုက်သူမဟုတ်။ ကားဘော်ဒီထုသူမဟုတ်၊ မိုက်ကရိုချစ်(ပ) ထုတ်လုပ်သူမဟုတ်။ ရက်ကန်း ရက်သူမဟုတ်။ လက်သမားမဟုတ်။ သိပ္ပံပညာရှင် မဟုတ်။ သုတေသီ မဟုတ်။ ကျမ်းသုံးထောင် ကုန်အောင်ဖတ်သော ပါမောက္ခမဟုတ်။ ဆရာဝန်မဟုတ်။ ကချေသည်မဟုတ်။ တပ်မှူးမဟုတ်။ ဂေါ်ဖီထုပ်ရောင်းသူမဟုတ်။ ဒဿနိကဗေဒ ပညာရှင်မဟုတ်။ ဖန်ခွက်ဆိုင်ထဲ ဝင်သည့်ကျွဲလို မည်းမည်းမြင်တိုင်း ဝင်ခတ်သူမဟုတ်။ ဝေဖန်ရေးဆရာ မဟုတ်။ ထိုသူအားလုံး ဟုတ်ချင်ဟုတ်မည်။

ကဗျာဆရာသည် ကဗျာဆရာဖြစ်၏။ ဟေမာနေဝင်း ဘာပြောချင်သလဲ။ သီချင်းကလေးထဲက အရဲစွန့်ပြီး ပြောစရာမလို။ ရဲရဲဝံ့ဝံ့သာ ပြောလိုက်ပါ။ ကဗျာဆရာသည် ကဗျာဆရာဖြစ်သည်ဟု ရဲရဲဝံ့ဝံ့သာ ပြောလိုက်ပါ။ မဆိုင်သောအရာတွေ လေကြောရှည် နေသူများကိုလည်း မင်း၏ပျားရည်အသံကလေးဖြင့် ခြေထောက်လှလှကလေး တစ်ချက် ဆောင့်၍ သွားကြစမ်း…တိတ်ကြစမ်းဟု ငေါက်လိုက်ပါ။ ကမ္ဘာလောက၏ ကောင်းချီးပေးသံတို့ဖြင့် သူတို့ကို နှစ်မြှုပ်ပြီးသား ဖြစ်သွားပါလိမ့်မည်။

အနာဂတ်အတွက် နေခြည်အသစ်တို့ ဖွင့်လှစ်ပေးသော မိုးကောင်းကင်မှာ ကဗျာရှိနေမည်မှာ သေချာပါ၏။ ဆာလောင်ခြင်း၊ မွတ်သိပ်ခြင်း၊ မပြည့်စုံခြင်း၊ အထိတ်တလန့်ဖြစ်ရခြင်း၊ ဖြေရှင်းမရခြင်း၊ အနှစ်သာရကင်းမဲ့ခြင်း၊ ရဲဝံ့စွာ မရယ်မောနိုင်ခြင်း ထိုအရာအားလုံးကင်းသောနေရာနှင့် အချိန်က ကဗျာကို မျှော်လင့်စောင့်စား၏။

တဖွဲဖွဲကြွေ၍ မြေပြင်မှာ အဝါရောင်ပန်းကော်ဇောခင်းသည့် ပိတောက်ပင်ခြေရင်းမှာ ပလ္လင်ဆောက်၍ ကဗျာကို လောက၏ ဘုရင် အဖြစ် မြှောက်ကြမည်။ တညင်းသီး၊ ကြွက်စုတ်နှင့် ကွန်မြူနစ်ဝါဒ မရှိသော ကော်ဖီဆိုင် ထီးအကျားအောက်မှာ ကော်ဖီသောက်ရင်း ကဗျာကို စောင့်ကြမည်။ အကောင်းဆုံး အကြံ ပေးလိုက်မည်။ ခပ်ဝေးဝေးသွားကြ။ ဆာလောင်သည်၊ မွတ်သိပ်သည်၊ မပြည့်စုံ၊ ထိတ်လန့်သည်၊ ဖြေရှင်းမရ၊ အနှစ်သာရ၊ ဗလာ၊ ရဲဝံ့စွာ ရယ်မော။ ငါတို့ သီချင်းနားထောင်နေသည်။ ငါတို့ ကဗျာဖတ်ချင်သည်။ ကဗျာသောင်စပ်မှာ ကဗျာဟု စာလုံးရေးလိုက်ပြီးသည်နှင့် လှိုင်းခေါင်းဖြူ အမြှုပ်ဖွေးတို့က ရေဆေး၍ ချလိုက်၏။ သဲပြင်ပေါ်မှာ ကဗျာ၏ ခြေရာ၊ ကဗျာ။ ကျောက်သားပေါ်မှာ၊ ပန်းပွင့်ပေါ်မှာ၊ လွယ်အိတ်ထဲမှာ၊ လှေကားပေါ်မှာ၊ ပန်းကန်ပြားပေါ်မှာ၊ လရောင်ခြည်ထဲမှာ၊ နှင်းမှုန်ထဲမှာ၊ ဝါးရွက်ကြားမှာ၊ ယုဇနပင်အောက်မှာ၊ သရက်ပင်ထိပ်ဖျားမှာ၊ ပင်လယ်ထဲမှာ၊ ဘဏ်တိုက်ထဲမှာ၊ အက်ဖ် ၁၆ လေယာဉ်ပျံပေါ်မှာ၊ ပင်လယ်ထဲမှာ၊ ဧဝရတ်တောင်ထပ်မှာ၊ မြစ်ကြီးနားမှာ၊ ပုဂံယွန်းကျောင်းမှာ၊ စိန်ဗေဒါကြီး၏ ကျောက်ရုပ်မှာ၊ တစ်နေ့နေ့လူသန့်သွားသော ကမ္ဘာကြီးမှာ…ကဗျာတွေ။ တစ်နေ့နေ့လူသန့်သွားသော ကမ္ဘာကြီးမှာ…ကဗျာတွေ။ ညင်သာစွာ တီးမှုတ်၍ မန္တလေးကျုံးတော်တွင်းက ရေကင်းသံဖြင့် လူသန့်သွားသောအခါ၊ တစ်နေ့နေ့၊ မန္တလေးကျုံးတော်တွင်းက ရေကင်းသံဖြင့် ကဗျာကို ကြိုဆိုကြပါမည်။ မန္တလေးမှာ လူသန့်သွားသောအခါ။ တညင်းသီးဆားရည်စိမ်ရယ်၊ ကြွက်စုတ်ရယ်၊ ကွန်မြူနစ်ဝါဒရယ် မရှိသော သောင်စပ်က ကော်ဖီဆိုင်လေးမှာ။ ရေခဲစိမ်ကော်ဖီနှစ်ခွက်ကို ကဗျာများများထည့်၍ ပါးစပ်အားနေလျှင် ချောင်းဆိုးပါ။ ဝင်ဝင်မပြောပါနှင့်။ လက်အားနေလျှင် တယောထိုးပါ။ တယောထိုးပါ။ ချောင်းဆိုးပါ။ သို့မဟုတ် အိပ်ပျော်အောင် အိပ်လိုက်ပါ။ အိပ်မက်ထဲမှာ နီရိုးဘုရင် ကိုတွေ့လျှင် နှုတ်ဆက်ဖြစ်အောင်ဆက်ပါ။ သူ့ကို ကဗျာအကြောင်း သွားမစပါနှင့်။ မိုးဦးစောမည်။ မြစ်ရေကြီးမည် ဖြစ်ကြောင်း မိုးလေဝသနှင့် ဇလဗေဒပညာရှင်များ ကြိုတင်ပြောကြကောင်းပါရဲ့။ ကဗျာမြစ်သည် ကောင်းကင်မှာ စီးဆင်းနေ၏။ အမှိုက်ပုံထဲမှာ လူတစ်ယောက်၏ ကျောရိုးတစ်ချောင်းနှင့် လူတစ်ယောက်၏ ဦးနှောက်တစ်ခြမ်းပဲ့။ တူးကော်…ကဗျာများ…သကြားချိုချို။

လူသန့်လျှင် ကဗျာသန့်မည်။ သီချင်းတွေချိုမည်။ စိတ်ထားတွေချိုမည်။ နားလည်လာ၍ ချိုမည်။ ယုံကြည်လာ၍ ပိုချိုမည်။ ပြည့်စုံလာ၍ ချိုမည်။ စားကောင်းသောက်ဖွယ်များဖြင့် ချိုမည်။ တကယ်ပြည့်စုံလာမည့် ကတိစကားများဖြင့် ချိုမည်။ အချစ်များဖြင့် ချိုမည်။ မိုက်မလင်းနိုင်ဘု၊ ကျောက်စီခြယ်ရွှေကလာပ်မှာ ကဗျာသည် ဘုရင်ဖြစ်၏။ ကဗျာမြစ်ကောင်းကင်မှာ စီး၏။ ခါတော်မီ သီမဝေ့နိုင်ဘု၊ သည်ကွေ့မှာ ကဗျာသည် အကြီးအကျယ် အမြင့်မြတ်ဆုံး ဖြစ်၏။ ကတ္တီပါပန်းခင်းထဲက တမ်းချင်းအသစ်ရွှေကဗျာ။ သံစဉ်သွင်း၍ သီချင်းဆိုသောအခါ ဟေမာနေဝင်းဆိုပါစေ။ အဝေးဆုံးတစ်နေရာ မြစ်ညှာအရပ်ဆီမှ သစ်ရွက်စိမ်းများ ညှော်နံ့ရသည်။ ပြောင်းပြန် မြင်ရသော ခပ်ဝေးဝေးက ရေတံခွန်တစ်ခုပမာ၊ မီးခိုးများ ခွေလိပ် တွန့်တက်နေသည်။ သီချင်းများ၊ ကဗျာများ လွတ်ရာကို ရွှေ့၍ထားပါ။ အုတ်ခဲနှင့် ကျောက်တုံးများ လူအုပ်ထဲရောက်နေသည်။

ရွာလယ်မှာ ကလေးတွေဘာကြောင့် ဆူနေကြသလဲ၊ မွှေးပျံ့သော ပန်းခင်းထဲမှ ပန်းခြင်းတစ်ခုစာ ပန်းအပြာရောင်များ ခူးပြီးနောက် ကဗျာဆရာကို ကမ္ဘာလောက၏ လက်ဆောင်အဖြစ် ပေးအပ်ကြမည်။ ကောလိပ်ဂျင်နေဝင်းသမီးကလေး သဘောတူပါရဲ့လား။ သူတို့ကို ငေါက်ငမ်းပစ်လိုက်စမ်း။ လူသန့်သွားသည်အထိ ကျေးဇူးပြု၍ သီချင်းဆက်ဆိုပါဦး ကလေးမ။

ဇော်ဇော်အောင်
စာပေါင်းသိုက်အက်ဆေးများ

Sunday, January 3, 2010

Invictus

Out of the night that covers me,
Black as the pit from pole to pole,
I thank whatever gods may be
For my unconquerable soul.

In the fell clutch of circumstance
I have not winced nor cried aloud.
Under the bludgeonings of chance
My head is bloody, but unbowed.

Beyond this place of wrath and tears
Looms but the Horror of the shade,
And yet the menace of the years
Finds and shall find me unafraid.

It matters not how strait the gate,
How charged with punishments the scroll,
I am the master of my fate:
I am the captain of my soul
.

William Ernest Henley (1849–1903)

Friday, January 1, 2010

နှစ်ကူးအမျှင်များ

ဒီနှစ်ကို လည်ပြန်လှည့်ကြည့်တော့
အပ်ချည်ကြိုးပါးပါးနဲ့
ဘဲဥတစ်လုံးကို လှီးဖြတ်လိုက်သလိုမျိုး
သံယောဇဉ် နန်းကြိုးမျှင်လှပ်လှပ်က
ငါ့နှလုံးသားကို “ဟက်ကနဲ”

ခြေတစ်လှမ်းစာလောက်
ဒါပေမယ့်
ငါတို့နှစ်ယောက်က ကမ္ဘာ့မြေပုံပေါ်မှာ
တစ်ယောက်တစ်ခြမ်းစီ

ဆောင်းနှင်းစက်တွေပြိုးပြက်
ဓားမိုးတွေတလက်လက်သည်းတဲ့ နှစ်သစ်ကူးည
ဟက်ပီးနယူးယီးယား အော်သံတွေ...
ငါ့အတွက်တော့
လမင်းက အနက်
ကြယ်တွေလည်း အနက်
တိမ်တွေလည်း အနက်
ပင်လယ်လည်း အနက်
ဝုန်းကနဲ အသံနက်ကြီးနဲ့ပေါက်ကွဲ
မီးရူးမီးပန်း အနက်ရောင်တွေ
…..
…..ရယ်
လောကကြီးက
မျက်မမြင်တစ်ယောက်ရဲ့ ရှု့မျှော်ခင်းပန်းချီလို
ပိန်းပိတ်အောင်မှောင်လိုက်တာ..

အချစ်နတ်ဘုရားမ,စစ်တဲ့ ဘာသာဗေဒအောာင်စာရင်းမှာ
အဲဒီနှစ်က ငါ့နာမည်မပါခဲ့ဘူး..