Sunday, June 24, 2007

ကုဋေရှစ်ဆယ်သူဠေးသားနဲ့ ကျွန်တော်

ဒေါင်းယောင်ဆောင်တဲ့ ကျီးကိုဝိုင်းပြီးလက်ညှိုးထိုးသလိုပဲ

လူတွေက ကိုယ်နဲ့မတူတဲ့လူကို ဝိုင်းပြီးလက်ညှိုးထိုးတတ်ကြတယ်….

သင်ကောဘယ်နှစ်ခါထိုးပြီးပြီလဲ?

ဒီလိုပါဘဲ ကျွန်တော်လည်း ကုဋေရှစ်ဆယ်သူဠေးသားကို သူများလိုပဲ လက်ညိူးထိုးဘူးပါတယ်။ သေချာပြန်တွေးကြည့်မှ ကုဋေရှစ်ဆယ်သူဠေးသားမှာ အပြစ်မရှိတာကိုတွေ့လိုက်ရပါတယ်။

သူ့မှာဘာအမှားရှိလို့လဲ။ ငယ်ငယ်တုန်းက မိဘကလိုလေသေးမရှိ ခြေမွှေးမီးမလောင် လက်မွှေးမီးမလောင်အောင် ထားခဲ့။

အတန်းပညာတောင်မှ သားငယ်ပင်ပန်းမှာစိုးလို့ ပညာအမွေမပေးခဲ့။ ဒီလိုနဲ့သူဠေးသားက ယောင်နနနဲ့ လောကကြီးမှာ ကြီးပြင်းလာခဲ့။ ပညာမတတ်တော့မှ သိုထားမတတ်အရပ်အရပ်၌ ဆိုသလို ရှိသမျှအမွေတွေကို အပေါင်းအသင်းဘော်ဒါတွေနဲ့ သုန်းဖြုန်းပေတေခဲ့။ ဒီအပြင် များစွာကျွန်ပေါင်းမကောင်းခိုးယူ ဆိုသလို ရှိသမျှအမွေကို ဘတ်ကီးရိုက်တဲ့သူကလည်း ရှိသေးတယ်။ အိမ်ကိုရောင်း၊ ရှိသမျှထုခွဲရောင်းချ ဒီလိုနဲ့နေလာလိုက်တာ ကုဋေရှစ်ဆယ် အကုန် ပုစွန်တောင်မီးလောင် တက်တက်ပြောင်ရော။ ဒါတောင်သူက ခိုးဆိုးလုယက် ဓားပြတိုက်မစားဘူး။ ခွက်ဆွဲပြီးတောင်းစားတယ်။ ဘယ်မှာလဲ သူ့အပေါင်းအသင်းတွေ၊ ဆွေမျိုးတွေ၊ သူကောင်းစားတုန်းက ကြတော့အိမ်ပေါ်တက် ရှိသမျှအကုန် ယူငင်ပြီး သူ့မှာတစ်ပြားမှ မရှိတော့အဖက်လုပ်ဖို့ မပြောနဲ့

ထောင်းထောင်းကြေလျှက် ခွက်လက်ဆွဲကာတောင်းစားပါလည်း

သင်သာလူမိုက် ဒုစရိုက်ဟု ရိုက်ပုတ်လိုက်ကြ

ရွာမှထွက်လေ တောမှာသေသည်

ကောင်သေလင်းတကြ၏တည်း။

သူ့ကို ရိုက်ပုတ်ပြီး ရွာကနှင်ထုတ် သူ့ခမျာ တောမှာအသေဆိုးနဲ့သေရရှာတယ်။ ကဲ ဘယ်သူ့ကို လက်ညိူးထိုးမလဲ?

ပညာအမွေမပေးခဲ့တဲ့ သူ့မိဘကိုပဲလား?

ဒါမှမဟုတ် နုံလွန်းအလွန်းတဲ့ သူဠေးသားကိုပဲလား?

သူ့ရှိနှိုက်စား ကိုယ့်ရှိဖွက်ထားတဲ့ ပတ်ဝန်းကျင်ပဲလား?

သူဠေးသားမှာ မိတ်ဆွေကောင်းမရှိလို့ပဲလား?

ကံကြမ္မာကိုပဲ ရိုးမယ်ဖွဲ့မလား?

ဆားတောင်ဆရာတော် စဉ်းစားစေချင်တာဘာလဲ?

ပညာမတတ်လို့ ဒုက္ခရောက်တတ်ကြောင်းထောက်ပြချင်တာလား? ဒါပေမယ့် ပညာမတတ်တဲ့ မီလျံနာတွေ ဒုနဲ့ဒေး။

ပတ်ဝန်းကျင်ကို ဂရုစိုက်ပြီး မိတ်ဆွေကောင်းအမှန်တကယ် လိုအပ်တာကိုပြောချင်တာလား? ကိုယ်ကောင်းရင် ခေါင်းဘယ်မှ မရွေ့ဘူးတဲ့။

သေချာစဉ်းစားကြည့်ရင် မေးခွန်းတွေအများကြီးရပါတယ်။ စောဒကတက်စရာ တွေလည်းအမျာကြီး ရှိပါတယ်။

ဒါပေမယ့် သေချာတာကတော့ ငယ်ငယ်တုန်းက ကျွန်တော်လည်းသူများလက်ညိူးထိုးတိုင်း အလွတ်ကျက်ပြီး လိုက်ထိုးခဲ့ဘူးပါတယ်။

2 comments:

  1. ကျွန်တော်လည်း ပါ ပါတယ်ခင်ဗျာ။
    Yours sincerely,

    ReplyDelete